തിരുവനന്തപുരം:

ഗോവ വിമോചന സമരത്തിൽ പങ്കെടുക്കാനായി കേരളത്തിൽ നിന്നു ഗോവയിലേക്ക് പോയ ധീര സമരപോരാളികളുടെ കുടുംബാംഗങ്ങളെ ലോക് ഭവൻ ആദരിക്കുന്നു. ഗോവ വിമോചന ദിനമായ ഡിസംബർ 19-ന് വൈകിട്ട് നാലുമണിക്ക് ലോക് ഭവനിൽ നടക്കുന്ന ചടങ്ങിൽ ഗവർണർ രാജേന്ദ്ര വിശ്വനാഥ് ആർലേക്കർ പങ്കെടുക്കും.

സ്വാതന്ത്ര്യസമരത്തിൽ പങ്കാളികളായ കേരളത്തിലെ പോരാളികളുടെ മഹത്തായ സംഭാവന ആദരപൂർവ്വം അംഗീകരിക്കുക, ഗോവയുടെ വിമോചനവുമായി ബന്ധപ്പെട്ട ചരിത്ര പൈതൃകം സംരക്ഷിച്ച് പൊതുജനങ്ങളിലേക്കും പുതുതലമുറയിലേക്കും വ്യാപകമായി എത്തിക്കുക, ദേശാഭിമാനത്തിന്റെയും ദേശീയ ഐക്യത്തിന്റെയും മൂല്യങ്ങൾ ഭാവിതലമുറകളെ പ്രചോദിപ്പിക്കുന്ന വിധത്തിൽ ഉറപ്പിച്ചു നിർത്തുക എന്നീ ഉദ്ദേശ്യങ്ങളോടെയാണ് പരിപാടി സംഘടിപ്പിക്കുന്നത്.

ഗോവ വിമോചന പ്രസ്ഥാനം ഇന്ത്യയുടെ സ്വാതന്ത്ര്യാനന്തര പോരാട്ടചരിത്രത്തിലെ നിർണായകമായ ഒരു അധ്യായമായിരുന്നു. 1961-ൽ പോർച്ചുഗീസ് കോളനിയൽ ആധിപത്യം അവസാനിപ്പിച്ചതോടെയാണ് ഈ സമരം വിജയം കണ്ടത്. രാഷ്ട്രീയ, സാംസ്‌കാരിക, ആയുധപരമായ ചെറുത്തുനിൽപ്പുകളുടെ ദീർഘനാളത്തെ സമന്വയമായിരുന്നു ഈ പ്രസ്ഥാനം. കേരളം ഉൾപ്പെടെ രാജ്യത്തിന്റെ വിവിധ ഭാഗങ്ങളിൽ നിന്നുള്ള സ്വാതന്ത്ര്യസമര സേനാനികളുടെ പങ്കാളിത്തം ഈ പോരാട്ടത്തിന് വലിയ കരുത്തായി.

ഗോവ വിമോചന സമരത്തിൽ നിരവധി മലയാളികൾ നേരിട്ടും സജീവമായും പങ്കെടുത്തു. ജനസംഘം, പ്രജാ സോഷ്യലിസ്റ്റ് പാർട്ടി, കമ്മ്യൂണിസ്റ്റ് പാർട്ടി എന്നീ രാഷ്ട്രീയ പ്രസ്ഥാനങ്ങളെ പ്രതിനിധീകരിച്ച പ്രവർത്തകർ സമരത്തിന്റെ മുൻനിരയിലെത്തി. നിരവധി സന്നദ്ധ പ്രവർത്തകർ പോർച്ചുഗീസ് ഭരണകൂടത്തിന്റെ ക്രൂരമായ പീഡനങ്ങൾക്കും മർദനങ്ങൾക്കും ഇരയായി.

ഗോവ വിമോചന സമരത്തിൽ പങ്കെടുത്തവരെ കേന്ദ്ര സർക്കാർ സ്വാതന്ത്ര്യസമര സേനാനികളായി അംഗീകരിച്ചിട്ടുണ്ട്. ആ ധീര സമരസേനാനികളുടെ കുടുംബാംഗങ്ങളെയാണ് ചടങ്ങിൽ ആദരിക്കുന്നത്. സമരത്തിൽ പങ്കെടുത്തവരിൽ കാസർഗോഡിലെ കെ. വി. നാരായണനാണ് ഇന്ന് ജീവിച്ചിരിക്കുന്ന ഏക സാക്ഷി.

ഗോവ വിമോചന സമരത്തിൽ പങ്കെടുത്തവരിൽ പലരും പിന്നീട് രാഷ്ട്രീയ–സാമൂഹിക രംഗങ്ങളിൽ ശ്രദ്ധേയമായ സ്ഥാനങ്ങൾ വഹിച്ചു. പാലക്കാട് ചിറ്റൂരിലെ ശിവരാമ ഭാരതി എം.എൽ.എയായി. കെ. കെളപ്പൻ നായരുടെ മകനായ സത്യൻ കോക്കേരി എം.എൽ.എയായി സേവനമനുഷ്ഠിച്ചു. കെ. എ. ശങ്കര മേനോൻ ബിജെപിയുടെ ദേശീയ കൗൺസിൽ അംഗമായി ഉയർന്നു.

ഗോവ വിമോചന പ്രസ്ഥാനവുമായി ബന്ധപ്പെട്ട് കേരളത്തിന് മറ്റൊരു നിർണായക ബന്ധവുമുണ്ട്. പോർച്ചുഗീസ് അധീനതയിൽ നിന്ന് ഗോവയെ മോചിപ്പിച്ച സൈനിക നീക്കത്തിന് നേതൃത്വം നൽകിയിരുന്നത് ഒരു മലയാളിയായിരുന്നു — ജെ. പി. കണ്ടത്ത്. തന്റെ തന്ത്രപരമായ മികവും വീര്യവും മൂലം അദ്ദേഹം 'ഗോവയുടെ വിമോചകൻ' എന്ന പേരിൽ പ്രസിദ്ധനായി.

'ഓപ്പറേഷൻ വിജയ്' എന്ന പേരിൽ അറിയപ്പെട്ട സൈനിക നടപടിയിൽ പങ്കെടുത്ത മലയാളി ലഫ്റ്റനന്റ് കേഡർ പി. കെ. എൻ. പിള്ളയെയും ചടങ്ങിൽ പ്രത്യേകം ആദരിക്കും.